స్థానిక సంస్థల ఎన్నికల నేపథ్యంలో ఆంధ్రప్రదేశ్ రాష్ట్ర ఎన్నికల ప్రధాన అధికారి అనిల్ చంద్ర పునేఠా మరో కీలక ప్రకటన విడుదల చేశారు. రాష్ట్రంలో జెడ్పీటీసీ, ఎంపీటీసీ ఎన్నికలకు నామినేషన్ల గడువు ఈ రోజు సాయంత్రం 5 గంటలతో ముగియనుందని తెలిపారు. కలెక్టర్లు, జిల్లా ఎన్నికల అధికారులు, ఎస్పీలు తమను నామినేషన్లు దాఖలు చేయకుండా ఎవరైన అడ్డుకున్నారా అనే ఫిర్యాదులను వెంటనే పరిశీలించాలని ఆదేశించారు.ఈ ఫిర్యాదుల విషయంలో అధికారులు వెంటనే ఫిర్యాదుదారులను ఫోన్‌లో సంప్రదించి సాయంత్రం 5 గంటల్లోపు వారితో నామినేషన్ దాఖలు చేయడానికి తగిన ఏర్పాట్లు చేయాలని సూచించారు. ఈ విధానానికి అనుగుణంగా సమర్పించిన నామినేషన్లను స్వీకరించాలని రిటర్నింగ్ అధికారులను ఆదేశించాలని అన్నారు. నామినేషన్ల కేంద్రానికి వెళ్లేందుకు అవసరమైన ప్రాంతాల్లో అభ్యర్థులకు వ్యక్తిగత భద్రత కల్పించాలని ఆదేశించారు. నామినేషన్లు వేసేందుకు అవసరమైన ప్రశాంత వాతావరణం కూడా కల్పించాలని ఆదేశించారు.