కారంపూడిలోని చారిత్రక వీర్ల దేవాలయ ప్రాంగణంలో ఏపుగా పెరిగిన వేప, మర్రి, రావి చెట్లను నిర్దాక్షిణ్యంగా నరికివేస్తున్నారు.

ఒకవైపు ప్రభుత్వం అభివృద్ధితోపాటు పర్యావరణ పరిరక్షణకు, 50 శాతం గ్రీన్ కవరేజ్ లక్ష్య సాధనకు, సామాజిక అడవుల పెంపకానికి ప్రాధాన్యత ఇస్తుంటే, మరోవైపు ఇప్పటికే పెరిగిన చెట్లను నరికివేయడం ఆందోళన కలిగిస్తోంది.

గతంలో ఈ ప్రాంతంలో నీడ లేక భక్తులు తీవ్ర ఇబ్బందులు పడేవారు.

భక్తులకు నీడ కల్పించాలనే ఉద్దేశంతో నాటి పెంచిన చెట్లు ఇప్పుడు పెద్దవై నీడనిస్తున్న సమయంలో వాటిని దశలవారీగా తొలగిస్తున్నారు.

చెట్లను ఎందుకు నరికివేస్తున్నారని ప్రశ్నిస్తే పొంతనలేని సమాధానాలు చెబుతున్నారని స్థానికులు ఆవేదన వ్యక్తం చేస్తున్నారు.

గతంలోనూ ఈ ప్రాంతంలోని పురాతన రావి, వేప చెట్లను తొలగించినట్లు చెబుతున్నారు.

మరోవైపు గ్రామీణ ప్రాంతాల్లో చెట్ల అక్రమ నరికివేతకు పాల్పడుతున్న మాఫియా కూడా రెచ్చిపోతోందనే ఆరోపణలు వినిపిస్తున్నాయి.

అభివృద్ధి అంటే రోడ్లు, భవనాలు నిర్మించడం మాత్రమే కాదు..

ప్రకృతిని కాపాడుకుంటూ ప్రజలకు మెరుగైన జీవన వాతావరణాన్ని కల్పించడం కూడా.

అభివృద్ధి పనుల పేరుతో పచ్చదనాన్ని కోల్పోతే భవిష్యత్తులో పర్యావరణ సమస్యలు మరింత పెరిగే ప్రమాదం ఉంది.

ప్రభుత్వాలు మొక్కలు నాటాలని ప్రజలకు పిలుపునిస్తున్న సమయంలో, ఇప్పటికే ఏపుగా పెరిగిన చెట్లను కాపాడాల్సిన బాధ్యత కూడా సంబంధిత అధికారులపై ఉంది.

ఒక చెట్టు పెరిగి పెద్దదవడానికి ఎన్నో సంవత్సరాలు పడుతుంది.

దానిని నరికివేయడానికి కొన్ని నిమిషాలు చాలు.

చెట్లు మనకు నీడనివ్వడమే కాకుండా పక్షులకు ఆవాసాలను కల్పిస్తాయి.

వాతావరణ సమతుల్యతను కాపాడటంలో కీలక పాత్ర పోషిస్తాయి.

సంబంధిత అధికారులు స్పందించి కారంపూడి వీర్ల దేవాలయ ప్రాంగణంలో చెట్ల నరికివేతకు గల కారణాలను పరిశీలించాలి.

గ్రామాల్లో జరుగుతున్న చెట్ల అక్రమ నరికివేతను అరికట్టేందుకు చర్యలు తీసుకోవాలి.

అభివృద్ధి, పర్యావరణ పరిరక్షణ రెండింటికీ సమాన ప్రాధాన్యతనిస్తూ పచ్చదనాన్ని కాపాడాలి.

ఇలాంటి చర్యలను అడ్డుకునే ప్రయత్నం చేసి, ఆ వ్యక్తులపై చర్యలు తీసుకోవాలి.

భవిష్యత్ ఇలాంటి ఘటనలు పునరావృతం కాకుండా చట్టపరమైన చర్యలు తీసుకోవాలి.