పున్నమి ( పౌర్ణమి) గరుడసేవ

ప్రతి నెలా - ప్రతి పున్నమిరాత్రీ తిరుమలేశునికి పున్నమి గరుడసేవ జరుప బడుతుంది. ఆ రోజు సాయంకాలం ఏడు గంటలకు, వజ్రకవచ, వజ్రకిరీటధారి, సర్వాలంకరణ భూషితుడైన శ్రీమలయప్పస్వామి వారు గరుడునిపై వేంచేసి, ఛత్రచామరాలతో, గజ, తురగ, వషభరాజాలతో, తిరువీధుల్లో విహరిస్తారు.

ఇప్పటివరకూ గరుడ వాహనం చూడని వారు ఆ రోజు తిరుమల ప్రయాణ ఏర్పాట్లు చేసుకోగలరు. దర్శనం తో పాటు గరుడ వాహనం మీద స్వామి వారి దర్శనం కూడా లభిస్తుంది.

తిరుమలలో ప్రతి నెలా నిర్వహించే పౌర్ణమి గరుడసేవను తిరుమల తిరుపతి దేవస్థానం (టీటీడీ) 2006వ సంవత్సరంలో అధికారికంగా ప్రారంభించింది. సాధారణంగా తిరుమలలో గరుడ వాహనసేవ ప్రధానంగా వార్షిక బ్రహ్మోత్సవాలలో 5వ రోజు రాత్రి మాత్రమే జరుగుతుంది. బ్రహ్మోత్సవాల గరుడసేవ రోజున లక్షలాది మంది భక్తులు తరలిరావడంతో విపరీతమైన రద్దీ ఏర్పడి, చాలామంది భక్తులకు స్వామివారిని గరుడ వాహనంపై దర్శించుకునే భాగ్యం దక్కేది కాదు.

ఈ పరిస్థితిని దృష్టిలో ఉంచుకుని, సామాన్య భక్తులకు కూడా సంవత్సరంలో ప్రతి నెలా ఈ వైభవాన్ని కనులారా చూసే అవకాశం కల్పించాలనే సంకల్పంతో 2006 నుండి ప్రతి పౌర్ణమి నాడు రాత్రి వేళ శ్రీ మలయప్ప స్వామివారిని గరుడ వాహనంపై నాలుగు మాడ వీధుల్లో ఊరేగించే సంప్రదాయాన్ని ప్రారంభించారు.

తిరుమలలో పౌర్ణమి గరుడసేవ రోజున నాలుగు మాడ వీధుల్లోని గ్యాలరీలలో కూర్చుని స్వామివారిని దర్శించుకోవడానికి ప్రత్యేకమైన టికెట్లు ఏమీ అవసరం లేదు; ఇది భక్తులందరికీ పూర్తిగా ఉచితం. రాత్రి 7:00 గంటల నుండి 9:00 గంటల వరకు జరుగుతుంది. స్వామివారు వాహన మండపం నుంచి బయలుదేరి నాలుగు మాడ వీధుల్లో భక్తులకు దర్శనమిస్తారు. బ్రహ్మోత్సవాలతో పోలిస్తే పౌర్ణమి గరుడసేవకు రద్దీ సాధారణంగానే ఉంటుంది, అయినప్పటికీ ముందు వరుసల్లో కూర్చోవడానికి సాయంత్రం 5:00 నుండి 5:30 గంటల కల్లా మాడ వీధులకు చేరుకోవడం మంచిది.

కనీసం సాయంత్రం 6:00 గంటల లోపు గ్యాలరీలలోకి ప్రవేశిస్తే సౌకర్యవంతంగా కూర్చునే స్థలం దొరుకుతుంది. వాహన మండపం & బేడి ఆంజనేయస్వామి ఆలయ సమీపం: ఊరేగింపు ప్రారంభమయ్యే సమయంలో, ముగిసే సమయంలో స్వామివారిని అతి సమీపం నుండి చూడవచ్చు.

వీధుల మలుపులు : నాలుగు మాడ వీధులు కలిసే మూలల వద్ద గరుడ వాహనాన్ని కాసేపు నిలిపి మంగళహారతులు ఇస్తారు. ఇక్కడ కూర్చుంటే స్వామివారిని ఎక్కువ సమయం దర్శించుకునే అవకాశం ఉంటుంది.

ఇదీ చదవండి :: ఉమ్మడి అనంత మున్సిపాలిటీలన్నీ కూటమికే