బుమ్రాపై అలాంటి విమర్శలు చేయడం సరికాదు: షేన్ బాండ్

భారత్, న్యూజిలాండ్ మధ్య జరిగే ఐదు వన్డేల సిరీస్‌కు భారత స్టార్ పేసర్ జస్ప్రీత్ బుమ్రాకు విశ్రాంతి కల్పించారు. నవంబర్ 19 నుంచి ప్రారంభమయ్యే రెండు టెస్టుల సిరీస్‌కు అతడు తిరిగి జట్టులోకి వచ్చే అవకాశం ఉంది. ఇటీవలే గాయం నుంచి కోలుకున్న బుమ్రా విషయంలో టీమ్ మేనేజ్‌మెంట్ ఆచితూచి వ్యవహరిస్తోంది. ఈ క్రమంలో బుమ్రా వర్క్‌లోడ్ మేనేజ్‌మెంట్‌పై జరుగుతున్న చర్చకు న్యూజిలాండ్ దిగ్గజం షేన్ బాండ్ తెరదించాడు. బుమ్రా కావాలని కొన్ని సిరీస్‌లకు దూరంగా ఉంటున్నాడంటూ వస్తున్న వార్తలపై స్పందించాడు. బుమ్రాకు మద్దతుగా నిలుస్తూ.. అలాంటి విమర్శలు చేయడం సరికాదని అభిప్రాయపడ్డాడు. గాయాల నుంచి కోలుకుని తిరిగి అంతర్జాతీయ క్రికెట్‌లోకి రావడం ఫాస్ట్ బౌలర్లకు అంత సులభమైన విషయం కాదని గుర్తుచేశాడు.సీనియర్ బౌలర్లకు తమ శరీర సామర్థ్యం గురించి బాగా తెలుస్తుంది. వారు తమ పనిభారంపై వైద్య సిబ్బంది, కోచ్‌లతో నిరంతరం చర్చిస్తుంటారు. ఎంతవరకు ఆడగలరో అంచనా వేసుకుంటారు. ముఖ్యంగా గాయం నుంచి కోలుకుని తిరిగి పోటీ క్రికెట్‌లోకి అడుగుపెట్టే సమయంలో ఆచితూచి వ్యవహరిస్తారు. బుమ్రా కావాలనే మ్యాచ్‌లకు దూరంగా ఉంటున్నాడని విమర్శించడం చాలా అన్యాయం. ఇది ఒక్క బుమ్రాకే కాదు.. ప్రతి ఆటగాడికీ వర్తిస్తుంది. భారత్ ఏడాది పొడవునా భారీ షెడ్యూల్‌తో బిజీగా ఉంటుంది. అందుకే ఆటగాళ్ల పనిభారాన్ని జాగ్రత్తగా నిర్వహించడం చాలా అవసరం. వచ్చే ఏడాది అక్టోబర్ లేదా నవంబర్‌లో జరిగే ప్రపంచకప్ సమయానికి మన అత్యుత్తమ ఆటగాళ్లు పూర్తి ఫిట్‌నెస్‌తో ఉత్సాహంగా ఉండాలి’ అని షేన్ బాండ్ అభిప్రాయపడ్డాడు.

ఇదీ చదవండి :: ఉమ్మడి అనంత మున్సిపాలిటీలన్నీ కూటమికే