సంగారెడ్డి జిల్లాలో ఘోర ప్రమాదం.. ఇద్దరు కార్మికుల మృతి

సంగారెడ్డి జిల్లా జిన్నారం మండలం గడ్డపోతారం పారిశ్రామిక వాడలోని సరాక పరిశ్రమలో గ్యాస్‌ లీకేజీ కారణంగా ఘోర ప్రమాదం చోటుచేసుకుంది. ఈ ఘటనలో సుదర్శన్‌, బాలాజీ అనే ఇద్దరు కార్మికులు ఊపిరాడక మృతి చెందారు. ఈ ప్రమాదంతో పారిశ్రామిక వాడలో తీవ్ర విషాదం నెలకొంది.సమాచారం అందుకున్న పోలీసులు ఘటనా స్థలానికి చేరుకుని పరిశీలించారు. ప్రమాదం ఎలా జరిగింది? గ్యాస్‌ లీకేజీకి కారణాలేంటి? అనే కోణాల్లో దర్యాప్తు చేస్తున్నారు. పరిశ్రమలో భద్రతా ప్రమాణాలు పాటించారా? ప్రమాద నివారణకు అవసరమైన రక్షణ చర్యలు అందుబాటులో ఉన్నాయా? అనే అంశాలపైనా విచారణ చేపట్టారు. మరోవైపు, ఫ్యాక్టరీ యాజమాన్యం నిర్లక్ష్యం, భద్రతా చర్యల్లో లోపాలే గ్యాస్‌ లీకేజీకి కారణమై ఉండొచ్చని ఆరోపణలు వస్తున్నాయి.

కాగా, ఇద్దరు కార్మికుల మృతికి దారితీసిన ఈ ప్రమాదంపై సమగ్ర విచారణ జరిపి, బాధ్యులపై చర్యలు తీసుకోవాలని బాధిత కుటుంబాలు, కార్మిక సంఘాలు డిమాండ్ చేస్తున్నాయి. అయితే, ప్రమాదానికి గల కచ్చితమైన కారణాలు పోలీసుల దర్యాప్తులో వెల్లడికావాల్సి ఉంది. ఈ ఘటన పరిశ్రమల్లో కార్మికుల భద్రతకు ప్రాధాన్యం ఇవ్వాల్సిన అవసరాన్ని మరోసారి గుర్తుచేసింది.

ఇదీ చదవండి :: ఉమ్మడి అనంత మున్సిపాలిటీలన్నీ కూటమికే